اليوم بنزور قريبتنا هند نسلم ونطمن عليها ،
وش رايك تجين معنا يا ام احمد نتسلى ونسليها.
لا والله حشا مااروح لها بدون عزيمة،
تعزمكم وماعزمتني ولاسوت لي قدر وقيمة،
افا ياأم احمد قدرك ع العين والراس ولك الحشيمة،
بس هي ماعزمت احد ولا دعت سارا وحليمة.
حبينا نسوي واجب وقلنا القريب اولى بالوصل من الغريب.
ولاتنسين صلة الرحم واجب وصى علية الرسول الحبيب.
ترى مانسيت ذيك السنة يوم تعزم ام سعد وبناتها ، ونورة ودلال وامل وحمولة خواتها ،
وسوت لهم بوفية مقبلات وصواني واكلات شعبية.
والدي جي يرقع ماسكت اغنية ورى أغنية ،
ماقالت اعزم قريبتي واقدرها وتصير الفلة جماعية،
بس انا على نياتي واسامح ولا اشره على حرمه ولا بنية.
كل هذا ياام احمد وتسامحين ولا تشرهين،
انتي ماخليتي للمرة عذر ولا سموحه ،
تزعلين وتشرهين ولاتقدرين للمسلم ظروفه
احرصي وانا اختك على الوصل لاتقطعينة
والتمسي لاختك سبعين عذر لوماتعرفينة.
