هلا ومرحبا حي الله المشهور
طمني كيف الاحوال
ابشرك ف السناب ضارب والمشاهدات عال العال
طيب ضبطني يااخوك ، متابعيني خمس مئة ، لا كابتشر ولا كومنتات ، طول الوقت سكبات .
الحل عندي يافتحي اخلي مشاهداتك بالآلاف وتصير ماتلحق اعلانات،
علمني شلون تكفى وش الخطه،
خلني اطقطقها كم يوم وارجع لك بعد غطة.
تدخل علي ف السناب تكتب كومنت جارح وتسب وتغلط عليه،
واصور الشاشة وانزلها ستوري ،
واقول شوفوا قليل الذوق داخل يتهجم علية.
وتغلط على وارد عليك ، وارجع اسبك واشتم فيك ،
وتهددني وترفع علي قضية،
وتشهر فيني للناس علانية ،
ونسوي جو واكشن نقلب السوشل ميديا،
بيعرفونك ويعرفوني وتصير المشاهدات خرافية ،
بتجيك اضافات يومية، وناس تصور الشاشة وتنشر القصة الوهمية.
الناس ماتشبع فضول تحب تشوف وتعرف وش صار،
ثم ادخل عليك واطلب الإعتذار،
وتقول صرناحبايب واخوان وتتنازل عن القضية.
وتبدا تسوي إعلان لشركات ومطاعم ومحلات تجارية.
بس لاتنساني يافتحي بالنسبة لي خمسين بالمية،
والباقي حلال عليك جمعهم للسيارة والفيلا وللسفرة بالصيفية.
مشكور يااخوي ماتقصر والله انك كفو وشويه
شورك على راسي واكيد بنفذ الخطة الجهنمية.
( لاتجعلو من الحمقى مشاهير)
