وانتهت اجازتنا السعيدة وبنعود للدراسة.
كنا بالأمس نقول متى نعطل ؟
واليوم نشتري الشنطة والدفاتر والكراسة.
يمة : ماابي اداوم اول يوم ،
بدينا غياب من أولها يامريوم.
أخاف المعلمة تسألني وين سافرتوا بالاجازة؟
استحي اقول ماسافرنا واتلبك في الإجابة،
أنا أعلمك وش تقولين، واعلمك الرد وتكوني جاهزة .
( قولي اجزنا ودخل علينا شهر رمضان، رحنا مكة واخذنا عمرة ومرينا الطايف والمدينة،
وعيدنا عند خوالي بجدة ،اهل الرخاء والشدة.
وبعدين رجعنا لديرتنا ، اخذنا شالية على البحر،
مع عمامي وعماتي ، وفليناها اكل وشرب وسهر.
ودخل علينا شهر ذو القعده، وتخبرون صيف وحر ، قالت أمي بهذا الجو مالي قعدة.
وحجزنا تذاكر سفر لاسطنبول ،
فجأة جونا ضيوف من الديرة ،
بنت عمت امي فاطمة واختها منيرة،
وكنسلنا حجزنا وسفرتنا على طول.
ودخل علينا شهر ذو الحجة ، شهر فضيل يابخت من صامة وحجة،
زواج بنت عمي حمد رابع العيد ، بتاخذ محمد بن سعد يصير لنا من بعيد.
طيب يايمة اذا اسالتني وين عيدتو؟ !
اقول عيدنا هنا والا سافرنا دبي؟
قوليها عيدنا بديرتنا مانقدر نسافر ونخلي اضحيتنا.
هايامريوم شلون المدرسة ؟ عطيني علوم اول يوم،
ابشرك يايمة الابلة ماسالت وين رحتو بالاجازة،
حطتني عريفه عليهم وقالت لي لا اسمع صوت ،
الحمدلله عدى اول يوم على خير ،
ياجعلها سنة سعيدة وكل عام وانتو بخير
